മണ്ണും വിണ്ണും

വണ്ടേ വണ്ടേ കരിവണ്ടേ
എങ്ങോട്ടേയ്ക്കു പോണു നീ
പൂവുകള്‍ തോറും തേനുണ്ണാന്‍
പാറി പാറി പോണു ഞാന്‍

കാറ്റേ കാറ്റേ പൂങ്കാറ്റേ
എങ്ങോട്ടേയ്ക്കു പോണു നീ
നാടുകള്‍ തോറും പൂമണമേകാന്‍
തെന്നിത്തെന്നി പോണൂ ഞാന്‍

മുകിലേ മുകിലേ കാര്‍മുകിലേ
എങ്ങോട്ടേയ്ക്കു പോണു നീ
കാടും മേടും മഴയേകീടാന്‍
ചിറകുകള്‍ വീശി പോണൂ ഞാന്‍

അരുവീ അരുവീ തേനരുവീ
എങ്ങോട്ടേയ്ക്കു പോണു നീ
മണ്ണിതു മുഴുവന്‍ നീരേകീടാന്‍
ഓളം തല്ലി പോണൂ ഞാന്‍

മണ്ണും വിണ്ണും പുഴയും കാറ്റും
വേലകള്‍ ചെയ്യാന്‍ പോകുന്നു.
കുഞ്ഞേ നീയും പോവുക വേണം
നിന്നുടെ വേലകള്‍ ചെയ്തീടാന്‍!